LAOAG CITY – Naruay a pagadalan dagiti nagrikep idiay Puerto Rico gapu ti layus.
Basar ti report, awan sarday ti panagtudtudo iti nasao lugar a nangitunda ti nakaro a layus ken sumagmamano a panagregaay ti daga iti U.S. Caribbean territory.
Segun kenni Nino Correa, commissioner iti Bureau of Emergency Management and Disaster Administration, umabot iti innem a pulgada ti naitennag a tudo na iti sumagmamano a lugar.
Iti ili ti Toa Alta, Puerto Rico ti kakaruan a nalayus gapu ta umabot iti 16 a pulgada iti naitennag a tudo na sipud iti weekend.
Kabayatanna, adu pay a poon ti kayo dagiti natumba rason a kapilitan nga inrekep dagiti otoridad dagiti sumagmamano a main roads ken naruay a residente dagiti nagtalinaed iti evacuation kalpasan a nalayus ti pagtaengan da.
Nakapasar met ti dadakkel a dalluyon nga umabot iti 13 a kadapan ti kangato na kadagiti coastal areas iti Puerto Rico gapu ti dakes a panawen.
