LAOAG CITY – Naruay nga agtartaraken ti lames iti ili ti Bacarra ti naapektaran iti napasaran a napigsa a tudo.
Inbatad ni Brgy. Kagawad Robert Nacional iti Brgy. 16 ken maysa kadagiti agtartaraken ti lames a naminpinsan ti pannakadadael dagiti fish cage iti bislak river.
Segun ken ni Nacional, dakkel ti pukaw na ken dagiti pada na nga agtartaraken ti hito ken tilapia gapu iti panagngato ti danom iti karayan.
Inbatad na a malaksid kadagiti fish cage ket karaman a nadadael dagiti sumagmamano a cottage iti karayan.
Kuna na kaaduan kadakuada nga agtartaraken ti lames ket maysa a kilo laeng ti nabati manipod iti nangrugyan dagitoy a 30 a kilo.
Immuna iti daytoy, inpakaammo ni Nacional nga umabot iti 7,000 a pisos ti mapatta-patta a napukaw a puunan kadagiti taraken nga ikan malaksid iti agarup 4,000 a pisos a nausar iti pannakaaramid ti fish cage.
Maipalagip nga idi parbangon kalman ket napasaran ti napigsa a tudo iti nagduduma a lugar ditoy probinsya.
