LAOAG CITY – Nabuwak dagiti ado a pasahero iti Honolulu International Airport kangrunaan na dagiti adda iti terminal 2 kalpasan a bimtak ti maysa a laptop.
Basar ti nakalap nga impormasyon ni Bombo International Correspondent Manny Pascua idiy Hawaii, immuna a nagasok ti nasao a laptop.
Inbatad na nga uray dagiti pasahero a nakacheck-in ket nagtataray da a rimuar iti mismo a terminal 2 ket awan ti naaramidan dagiti opisyal ti nasao nga erupuerto.
Gapu ti napasamak ket sumagmamano nga oras a naitantan ti flights ken operasyon ti nasao nga erupuerto gapu ta saan a dagus a nagsubli iti uneg dagiti pasaheros.
Naamoan nga umabot ti 30 nga international flights ti naapektaran gapu ti napasamak nga insidente.
Innayon ni Pascua nga inpagarop dagiti pasaheros ket adda ti agpaltu-paltog iti uneg a mismo ti erupuerto isut gapuna a nagbuteng da ket nagtataray da a rimuar.
Agpapan ita ket saan pay a naestablisar dagiti otoridad no siasinno ti agtagikua ti bimtak a laptop.
