LAOAG CITY – Naduktalan ni Konsehal Jason Perera ditoy ciudad ti Laoag nga arigna amin a pasdek negosyo iti discolandia iti Barangay 1 ditoy ciudad ti Laoag ket awan ti business permit na.
Daytoy ket kalpasan a sinaludsud na iti Business Permit and Licensing Office (BPLO) no adda ti makaumanay a personnel da nga agsursur iti amin pasdek negosyo ditoy ciudad tapno maamoan no adda amin ti business permit da.
Kuna ni Perera a ditoy a naamoan na nga agkurkurang ti Business Permit and Licensing Office ti personnel na ken awan ti usaren da a lugan tapno agsursur kadagiti nagduduma a pasdek negosyo ditoy ciudad ti Laoag.
Kagiddan iti daytoy, naduktalan ni Perera ti maipapan iti kaawan ti business permit ti kaadoan a pasdek negosyo iti Discolandia.
Gapu iti daytoy, inlungalong na a manayunan ti personnel ti Business Permit and Licensing Office tapno masigurado nga adda dagiti agmonitor iti amin a pasdek negosyo ditoy ciudad ti Laoag.
Kabayatanna, inpalgak ni Barangay Chairman Manny Morales iti Barangay 1 ditoy ciudad ti Laoag a nakisarita da a dagus kadagiti opisyal iti Discolandia tapno maduktalan ken masita dagiti pasdek negosyo nga agop-operar nga awan ti lisensya na.
Kuna na nga awan ti datos da no mano ken no siasinno dagiti awan ti business permit na ngem daytoy ti pagtitinnulongan da nga amwen.
Inlawlawag pay ni Morales a kalpasan a naamoan da nga ado dagiti pasdek negosyo nga awan ti business permit na iti Discolandia ket inbilin na ti pannakapaiget ti tax collection iti masakupan na a barangay.
Innayon na a masapol a masursur amin dagiti addaan ti negosyo, bassit man wenno dakkel tapno maamoan no adda metlaeng ti business permit dagiti maseknan.
Mainaig iti daytoy, inadmitir ni Mr. Edgar Lao, Presidente iti Discolandia nga ado dagiti pasdek negosyo iti lugar nga awan ti business permit na.
Inpalgak na nga adda pay ti 10 a tawenen nga agop-operar a saan pulos a nangal-ala ti permit na no sadinno a masdaaw no apay a saan a sitaen iti City hall.
Inpetteng na nga unfair kadakuada a mangal-ala ti business permit na.
Inbatad ni Lao a kanayun ti panangpalagip da kadagiti pasdek negosyo iti Discolandia nga awan ti business permit na ngem agpapan ita ket saan paylaeng nga nagtungpal dagiti maseknan.
Inpaganetget ni Lao a saan a raso ti kaawan ti kwarta nga usaren iti panagala ti business permit gapu ta obligasyon daytoy dagiti addaan ti negosyo.
Pinaneknekan met ni Miss Arian Mosqueda, Vice President iti Barangay 1, Discolandia ditoy ciudad ti Laoag nga idi 2023 ket awan pulos ti nakita da a napan nagsita kadagiti pasdek negosyo nga awan ti business permit na.
