LAOAG CITY – Inpakaammo ni Bombo International News Correspondent Zenny Closa manipud idiay South Korea a naruay a Pilipino ti nakigtot ken madanagan kalpasan nga indeklara ni South Korean President Yoon Suk Yeol ti Martial Law.
Nupay kasta, inbatadna a normal wenno business as usual ti agdama a situasion iti pagilianda.
Segun ken ni Closa, awan ti naipatungpal a pannakasuspenso ti klase kadagiti pagadalan ken pangopisinaan iti baet ti deklarasion ti Presidente ti South Korea.
Inbatadna nga iti agdama ket naulimek ken awan ti aniaman a naidumduma a pasamak iti pagilianda.
Innayonna nga adda ti kellaat a panagtataripnong dagiti agpanpanday linteg ti South Korea tapno mapagnunumoan iti nagbalin a desision ti Presidente.
Immuna iti daytoy, inbabawi met laeng ni South Korean President Yoon Suk Yeol ti Martial Law kalpasan a nangipasa ti mosion ti South Korean parliament iti naisayangkat a National Assembly nga agkidkiddaw ti pannakapaikkat ti Martial Law.
