LAOAG CITY – Naragsak nga inpakaammo ni Bombo International News Correspondent Greg Pasalodos idiay United Kingdom a saan a nagpaudi dagiti naruay a Pilipino nga adda iti nasao a pagilian iti pannakipasetda ti pannakakorona da King Charles III ken ni Queen Camilla.
Segun kenkuana, saan a mailadawan ti kinaragsak dagiti kadaraan a Pilipino iti pannakaimatang ti naisangsangayan a pakasaritaan iti United Kingdom ken iti intero a sangalubungan.
Inbatadna a nagbalin a naanus a nagur-uray dagiti Pilipino iti pannakakorona da King Charles III ken ni Queen Camilla iti laksid a nagtudo pay kabayatan a maisaysayangkat ti naindaklan nga aktibidad iti nadakamat a pagilian.
Inlawlawagna a malaksid kadagiti nagturong mismo iti Westminster Abbey ket adu pay dagiti tattao ti nangpadaanan ti pannakaiyuswat ti programa kadagiti pagtaenganda babaen ti panagbuya dagitoy ti telebisyon.
Kunana nga adu dagiti nakipaset iti nasao nga aktibidad gapu ta nairana nga aldaw ti Sabado isu nga awan ti serrek dagiti estudiante ken mangmangged banag nga isu metten ti pananggundaway dagitoy tapno maimatangan ti naisangsangayan nga aktibidad.
Innayonna a naobserbaranna pay a kaadduan kadagiti pasdek-negosyo ken establishimento ket nagrikep ken nagsardeng ti operasion dagitoy tapno saan a mapalabes ti programa.
Kabayatanna, kiniddaw ni Pasalodos ken dagiti dadduma pay a Pilipino nga agnanaed idiay United Kingdom kadagiti baro nga ari ken reyna ti panangtulongda kadakuada ti mapaspasaran iti agdama nga inflation.
