LAOAG CITY – Inpalgak ni Mr. Perry Martinez, ti acting General Manager iti Ilocos Norte Electric Cooperative (INEC) nga ado dagiti makitkita na a problema iti operational efficiency kas iti structural ken personnel.
Kuna na a dagitoy ti tututukan na iti agdama ken ti laeng kidkiddawen na kadagiti empleado iti kooperatiba ket agtrabaho da a naimbag.
Inpakaammo na nga iti panagtugaw na kas acting General Manager iti kooperatiba ket ti maysa a kangrunaan a prayoridad na ket ti pannakaipababa ti presyo iti kuryente iti kada kilowatt hour.
Daytoy ket gapu ta aminado a no nangato ti singir iti kuryente ket ado dagiti makagura, saan laeng a ti mismo nga Ilocos Norte Electric Cooperative no di ket uray kadakuada nga agtrabtrabaho iti nasao a kooperatiba.
Mainaig iti daytoy, inlawlawag ni Martinez a kagudua iti bilang dagiti pimmanaw wenno nagikkat iti kooperatiba ket pinagsubli na.
Inbatad pay ni Martinez a pinanayunan na ti maysa a bolan ti pawayway a panagbayad ti bill dagiti member-consumers no sadinno a manipod iti dua a bolan ket nagbalinen a tallo a bolan.
Immunan nga inrakurak ni Martinez a bimmaba iti 63 a sentimos iti kada kilowatt hour wenno maipud iti P11.40 ket nagbalinen a P10.76 iti kada kilowatt hour ita a Disyembre.
