LAOAG CITY – Inbatad ni Ms. Janet Retamal, ti mangidadaulo iti Commission on Population and Development ditoy suidad ti Laoag a napateg ti panangipaay iti naan-anay nga adal kadagiti nagannak iti panangpundar ti napintas a relasion iti bukod a pamilya wenno kasano a pagbalinen dagitoy a “model family”.
Inlawlawag na a ti opisina da ket saan laeng a dagiti agtutubo ti tultulungan da kangrunaan na ti panangbagbaga kadakuada maipaggep iti panangurnos iti biag no di ket uray pay dagiti nagannak .
Kuna na a saan a maliklikan nga ado dagiti makapaspasar iti “broken family” gapu iti saan a panagkikinaawatan dagiti nagannak no sadinno a ti kangrunaan a maapektaran ket dagiti ubbing .
Inpaganetget na a kasapolan a pagtalinaeden ti napintas a relasion iti kada pamilya gapu ta no aniaman ti makitkita dagiti ubbing ket mabalin nga isu met ti aramiden da.
Mainaig iti daytoy, kuna ni Retamal nga agtultuloy ti panangiyuswat da kadagiti nagduduma a programa kas iti counseling a mabalin a pagdalanan dagiti agtutubo ken dagiti nagannak .
Mamati ni Retamal nga iti uneg iti pamilya iti umuna a pakaadalan dagiti agkakapintas nga aramid dagiti ubbing isut gapuna a kasapulan ti naan-anay a kooperasion dagiti nagannak tapno maiyadayo dagitoy iti aniaman a bisyo, panagrebelde ken dadduma pay.
