LAOAG CITY – Mabisbisin ti naruay a residente idiay Jamaica gapu iti kinaawan ti taraon gapu iti iduduprak ti Hurricane Melissa.
Agbirbiruk dagiti indibidual ti mabalinda a kanen kadagiti nadadael nga stores iti namnama a makaalada ti danum ken dadduma pay a taraon.
Marigrigatan dagiti residente sipod dimmuprak ti bagyo iti pagilianda a maibilang a kapigsaan a bagyo iti intero a lubong.
Makaspaspasar ti naruay a lugar idiay Jamaica ti kinaawan ti serbisio ti kuryente ken kinakurang ti danum gapu iti pannakadadael iti napigsa a bagyo.
Mainaig iti daytoy, basar kadagiti residente nga awan pay ti nakitada nga aid trucks a nagturong iti lugarda isut gapuna nga agkidkiddawda ti alisto a pannakaipaay ti tulong kadakuada.
Maipalagip nga adda ti 19 nga indibidual ti natay idiay Jamaica gapu iti Hurricane Melissa.
