LAOAG CITY – Iti umuna a gundaway, simmabak ti 21 humanoid robots iti maysa nga half-marathon idiay Beijing ngem imbes nga agpakitang-gilas, ad-adda a naibutaktak dagiti pagkapsutanda.
Naisayangkat ti “World’s First Humanoid Robot Half-Marathon” kagiddan ti 2025 Beijing Yizhuang Half Marathon.
Gagem nga ipakita dagiti robotics companies, kaaduan ket manipud idiay China, ti maipagarup a panangpartuat ti teknolohiada. Imbes nga adu ti mapabilib, naruay ti nadismaya iti nagbalin a taray ti robot.
Naammoan a dagiti rinibu a tattao ket napaspas a nagna iti 21-kilometer route, dagiti robot ke nakita nga adda ti seryoso a problema dagitoy.
Adda dagiti robot a bimmagsak nga insigida iti starting line idinto a dagiti agliklikos iti lugar wenno napan iti sabali a direksion.
Adda pay dagiti robot a kasapulan a bagkaten ken urnosen dagiti human handlers iti baet ti lumba.
Ti nagballigi a robot a ni Tiangong Ultra ket naglippas iti uneg ti dua nga oras ken 40 a minuto, adayo latta daytoy iti kinapaspas ti pudno a men’s champion a nakairekord ti 1 hour and 2 minutes.
Iti baet ti panagballigi ni Tiangong Ultra, sumagmamano a daras pay a kinasapulan a suktan dagiti batteries.
