LAOAG CITY – Naipaay ti naruay a tulong para kadagiti mannalon, mangngalap ken dagiti barangay kagiddan iti panangrambak iti maika-208 a founding anniversary ti Ilocos Norte ita nga aldaw, Pebrero 2, 2026.
Segun ken ni Gov. Cecilia Araneta Marcos, nangipaay ti Office of Civil Defense ti 800 a flashlight, 910 a pala, 7 nga units ti hand tractors, 2 nga units ti motorized banca, dry nets, 100 a sako ti abono ken dadduma pay.
Malaksid iti daytoy, nangidonar pay ti Office of Civil Defense ti 1 nga unit a pick-up nga usaren ti Provincial Disaster Risk Reduction and Management Office ken 23 nga units a motorcycle with sidecar.
Inbatad ni Gov. Marcos a kalpasan ti sumurok dua a siglo, ad-adda a dimmur-as ti probinsia gapu iti anus, panagpursige ken panagayat dagiti umili no sadinno nga inpasingkedna a pudno a napintas ken natan-ok ti probinsia.
Mainaig iti daytoy, dinayaw ti Gobernador dagiti mannalon a maibilang kas bannuar pakairamanan dagiti frontliners a mangprotprotehir kadagiti komunidad.
Inkarina pay a mangaramid kadagiti oportunidad tapno maprotektaran dagiti umili ken tapno maipasigurado a marikna ti panagdur-as iti tunggal Ilokano.
