LAOAG CITY – Maipaay dagiti tulong ti probinsia kadagiti tricycle driver bayat ti pannakaselebral ti maika-208 nga anibersaryo ti probinsia intono Pebrero 2 ita a tawen.
Segun kenni Governor Cecilia Araneta Marcos, karaman kadagiti maibunong kadagiti miembro ti Tricycle Operators and Drivers Association iti ili ti San Nicolas ket ti food packs ken tulong-pinansyal babaen ti programa ti Metro Ilocos Norte Council a “CERBISYO, AYAT ken MAKATULONG Program” kadagiti Public Utility Vehicle Drivers.
Naamoan a 3,365,000 amin ti pakabuklan ti tulong a maipaay kadagiti 1,346 a miembro ti TODA iti nasao nga ili a nakarehistro iti MINC ken narway a sabali pay a tulong manipod iti nagduduma nga opisina ti gobierno probinsial.
Mainaig iti daytoy, para iti napinpintas a pannakaselebral ti anibersaryo ti probinsia ket naideklarar nga special non-working holiday intono Pebrero dos babaen ti proclamation No. 1147 ni President Ferdiannd Marcos Jr.
