LAOAG CITY – Naruay nga estudiante ti College of Law ti Mariano Marcos State University ti interesado nga agbalin a “juris doctor scholar” ti gobierno probinsial ti Ilocos Norte.
Daytoy ti pinasingkedan ni Atty. Saniata Marcos a nangibagi ken ni Atty. Bryan Corpuz a Dean ti College of Law ti nadakamat nga unibersidad.
Inlawlawagna nga ipasimudaag daytoy ti kaadu dagiti nagaplikar iti nasao nga scholarship program ti probinsia.
Impalgakna nga iti masungad a Disiembre 27 ket dumalan dagiti aplikante iti eksaminasyon.
Mainaig iti daytoy, mangnamnama ni Marcos a naruay kadagitoy ti maala nga agbalin a juris doctor scholar ti Mariano Marcos State University.
Maipalagip a malaksid kadagiti mangal-ala ti kina-abogasia iti Mariano Marcos State University ket adda pay dagiti nagaplikar nga agad-adal iti Northwestern University.
Immun-una ngem iti daytoy, inrakurak ni Sang. Panlalawigan Member Atty. Saul Paolo Lazo, chairman ti committee on education nga uppat iti kada year level ti maala a juris doctor scholar.
Naammoan a kalikagum ni Gob. Matthew Marcos Manotoc a mairugin ita nga school year ti nasao nga scholarship program ti probinsia.
