LAOAG CITY – Naruay nga illegal a campaign materials ti binaklas ken nakolektar iti panangrugi ti campaign period kagiddan ti pannakaipatungpal ti ‘Operation Baklas’ iti intero a pagilian.
Basar iti Commission on Elections (COMELEC), dagiti nakolektar a posters ket idulin da paylaeng tapno usaren dagitoy kas ebidensya no adda dagiti kandidato nga agbalin a natangken ti ulo na ken maulit-ulit ti panagipaskil da kadagitoy kadagiti saan a common poster areas.
Iti agdama, agtultuloy ti panagrikos dagiti kameng ti Commission on Elections iti nagduduma a paset ti pagilian tapno ikkaten dagiti campaign materials a naikabil kadagiti poste ti kuryente wenno dagiti poon ti kayo.
Kuna ni Commission on Elections (COMELEC) Chairman George Erwin Garcia, tallo nga aldaw laeng ti ipaay da kadagiti kandidato tapno ikkaten dagiti campaign materials a naikabil iti saan nga usto a pakaikabilan da, gapu ta no saan da nga agtungpal ket isudan a mismo ti mapan mangikkat kadagitoy ken mabalin da pay ti sumango iti kaso kriminal.
Inlawlawag pay ni COMELEC Chairman Garcia a mabalin da nga i-presume dagiti kandidato nga isuda metlaeng ti nagikabil kadagitoy uray ibaga a ti kalaban da ti nagikab-it wenno dagiti supporters da.
Mainaig iti daytoy, inpasigurado ni Garcia nga awan ti palabsen da iti ‘Operation Baklas’ gapu ta amin nga aglabsing ket mapatawan ti maiyannatop a pannusa.
