LAOAG CITY – Napadur-as dagiti naruay a proyekto infrastraktura para iti benneg ti salun-at ditoy Ilocos Norte.
Segun ken ni Dr. Rogelio Balbag, Executive Director ti Hospital Management Council ti gobierno probinsial ti Ilocos Norte, daytoy ket babaen iti panangikalikagum ni Gob. Matthew Marcos Manotoc.
Inlawlawagna a maibilang ditoy ti panangrugin ti operasyon ti napalawa nga oxygen refilling plant ti oxygen generation plant a naiyestablisar iti sakop ti Gov. Roque B. Ablan Sr. Memorial Hospital.
Imbatadna nga iti agdama ket makapatauden ti nasao a planta iti walo aggingga iti sangapulo a tangke iti kada oras.
Kunana a kaipapanan daytoy nga addan ti umdas nga Oxygen para iti sibubukel a probinsia saan laengen a para kadagiti hospital iti Gov. Roque B. Ablan Sr. Memorial Hospital ken kadagiti district hospital ngem mabalin payen a masuplayan ti Mariano Marcos Mem. Hospital and Medical Center ken kadagiti pribado a hospital ti probinsia.
Malaksid iti nasao a pasilidad ket nangrugi payen ti pannakaipasdek ti tallo a kadsaaran a “laboratory building” ken iti sumaruno a tawen ket mapatakderan ti daan a pasdek iti uppat a kadsaaran a pasdek nga agbalor iti 110 a milyon a pisos.
Inbunannagna a mabalinen a kunaen a kumpleton dagiti pasilidad ken kagamitan ti hospital gapu ta malaksid iti Magnetic Resonance Imaging (MRI) ket adda payen ti baro a CT scan ti hospital.
Kabayatanna, inpakaammo ni Balbag a kadagiti district hospital, nalpasen ti annex building ti Bangui District hospital, mannarimaan ti “landscaping” ti sango ken maisaruno ti hospital building a napundoan ti 75 a milyon a pisos iti masungad a tawen, nalpas met aminen dagiti napalawa a “building” iti Dingras District Hospital ken adda ti nailatang manen a pundo a 35 a milyon a pisos para iti masungad a tawen idinto nga iti Dona Josefa Edralin Marcos District Hospital ket kaap-aprobar ti para iti pannakaiyestablisar ti slope protection iti likud a napundoan iti 30 a milyon a pisos pakairamanan ti pannakapasayaat ti emergency room idinto nga iti Piddig District Hospital ket malmalpasen ti baro nga uppat a kadsaaran a pasdek ken iti asideg ti hospital ti agserbinto nga Out Patient Department a napundoan ti 30 a milyon a pisos ken idiay Tamdagan District Hospital ket mannarimaan ti panagaplikar ti probinsia para iti panagbalinna a Basic Emergency Maternity and Obstetric Clinic ken mangal-aladan ti lisensia tapno agoperar a kas infirmary ken iti agdama ket addan ti baro a doctor iti daytoy a hospital ken addanto payen ti maala a pharmacist a taga Surong Valley ti ili a Vintar.
