LAOAG CITY – Naruay nga ubbing a babbai nga agtawen ti 9 agingga iti 14, pakairamanan dagiti inna da ti nabenipisiaran ti libre a bakuna kontra cervical cancer a naiwayat iti Ilocos Norte National High School (INNHS) ken Ilocos Norte College of Arts and Trade (INCAT) ditoy ciudad ti Laoag ita nga aldaw, Hulyo 9.
Daytoy ket babaen iti programa a ‘Ligtas sa Cervical Cancer Para sa Bawat Babae at Mag-Ina” Vaccination Program ni Presidente Ferdinand Marcos Jr.
Naisayangkat ti programa ditoy ciudad ti Laoag babaen iti Office of the Presidential Assistant for Northern Luzon Assistant Secretary Ana Remigio, 1st Congressional District Office, Department of Health a nakibinnuligan ti Department of Education-Laoag City, Ilocos Norte Provincial Government, Laoag City Government ken nagduduma nga ahensia ti gobyerno ken grupo.
Ti nasao nga aktibidad ket maituloy intono bigat, Hulyo 10 no sadinno a target a mabakunaan ditoy ciudad ti Laoag ti 3 ribo a babbai.
Mainaig iti daytoy, nagyaman ni Mayor James Bryan Alcid kada Presidente Marcos, Assistant Sec Remigio, Congressman Sandro Marcos, Department of Health ken dagiti aminen a timmulong iti pannakaiwayat ti naindaklan nga aktibidad.
Inpaganetget ti mayor a dakkel a tulong iti salun-at dagiti babbai ti panagbakuna da kontra iti cervical cancer.
Inpasingked ni Mayor Alcid a maiproyoridad ti salun-at ti tunggal Laoagueño gapu ta patien na a daytoy ti pakakitaan ken mangipaneknek iti naprogreso a lugar.
