LAOAG CITY – Naragsak nga inpakaammo ni Engr. Neil Jose, ti dati a Presidente iti Pugad Lawin a naruay nga umili dagiti nakipaset iti inyuswatda a Medical and Dental Mission idiay Sanchez Mira, Cagayan.
Segun kenkuana, balligi ti nasao a programa babaen iti pannakibinnuligda iti Medical Society of Ilocos Norte ken Philippine Dental Society of Ilocos Norte.
Inbatadna a dagusda a pinatgan ti panangiyuswatda ti Medical and Dental Mission kalpasan a nagkiddawda kadakuada maipanggep iti nasao nga aktibidad.
Inlawlawagna nga inakomodarda latta dagiti amin a nakipaset iti baet a nadanondan ti oras a panagngudo iti nasao a misyon.
Kunana a dakkel nga oportunidad kadakuada a maiyasideg ti serbisio medikal kadagiti umili.
Innayonna a naragsakda a makatulong kadagiti agkasapulan a tattao nangruna kadagiti saan unay a makapan iti ospital tapno agpakonsultar iti doktor.
