LAOAG CITY – Mapatta-patta nga agbalor ti nasurok tallo a milyon a pisos ti maipagarop nga iligal a droga ti nakumpiskar iti balligi a pannakaisayangkat ti drug-buy bust operation iti Sitio Uno, Barangay 16 iti ili ti San Nicolas.
Ti operasyon ket insyangkat ti nagtitipon a pwersa ti Philippine Drug Enforcement Agency, Regional Drug Enforcement Unit ket ti PNP-San Nicolas.
Nabigbig ti mismo a subject ti operasyon a ni John Mark Dinong, agtawen ti 33, addaan ti live-in partner, truck driver ken residente iti Barangay Baliweg iti ili ti Banna, ken ti kadua na iti apartment a ni Clifford Malana y Furaganan, agtawen ti 45, naasawaan, maysa a pintor ken tubo iti Aparri, Cagayan, ken agnanaed iti Barangay 16, San Nicolas.
Nakumpiskar manipud kadagiti subject ti maatap nga iligal a droga nga agdagsen ti 500 a gramo, maysa a kalibre 45 a paltog nga addaan ti 16 a bala ken dua a magazine ken nagduduma a drug paraphernalia.
Malaksid iti daytoy, nakumpiskar pay manipud kenni Dinong ket maysa a sachet ti maatap a droga nga isu ti inlako na iti police pusuer buyer, dua ribo a pisos a nagserbi kas buy-bust money, malaksid pay iti naala iti bulsa na a maysa met laeng a sachet ti maipagarop a droga.
Mainaig iti daytoy, inbatad ni Dinong a tinawagan isuna ti anak ni Malina a barkada na a mapan da balunan ti ama daytoy gapo ta damo da iti apartment da.
Inbatad na nga isu ti inaramid na rason nga awan ti ammo na kadagiti nakumpiskar a maipagarop nga iligal a droga gapo ta nabayagen a nagsardeng iti iligal nga aktibidad.
Naamoan a ni Dinong ket maikadua a darasen a natiliw no sadinno a ti ummuna ket iti ili ti Nueva Era gapo met laeng iti iligal a droga.
Nagkedked met a mangipaay ti komento ni Malana seknan iti pannakatiliw da ken dagiti narway a maipagarop nga iligal a droga, ken iti korte laengen ti pagpalawagan na.
Rumrumuar a ni Dinong ket maibilang nga High Value Individual.
Kabayatanna, inbatad ni Police Senior Master Sergeant Marcelino Corpuz Jr., team leader, agarop maysa a lawas pay laeng a sipsiputan da ti subject.
Inbatad na a basar iti monitoring da ket iti mismo apartment ti pakaiyus-uswatan ti iligal nga aktibidad.
