LAOAG CITY – Nasapa pay tapno maibaga a possible a reenacted budget ti maipatungpal intono 2026.
Daytoy ti inbatad ti maysa a private lawyer a ni Atty. Elreneo “Kidd” Ruiz Castro.
Inlawlawag ni Castro a maibaga laeng a reenacted ti budget para iti 2026 no saan a maipasa ti nailungalong a pondo agingga iti Disyembre 31 ita a tawen.
Mainaig iti daytoy, inrakurak ni Castro a dakkel ti epekto na iti Pilipinas no reenacted ti budget para iti 2026 gapu ta mangitunda iti pannakaitantan ti pannakaimplentar dagiti proyekto ti gobierno.
Innayon na a no ania laeng ti budget ita a tawen ket isu laeng met ti masurot wenno usaren para intono 2026.
Immuna iti daytoy, inrakurak ni Sen. Sherwin Gatchalian a maalarma iti possible a reenacted budget iti sumaruno a tawen no agdesisyon ti kongreso nga isubli ti 2026 National Expenditures Program (NEP) iti Department of Budget and Management (DBM).
Ti rekomendasyon nga isubli ti National Expenditures Program iti Department of Budget and Management ket indasar ti kamara de representantes kalpasan a naduktalan dagti alokasyon para kadagiti infrastructure projects a nalpasen.
