(Update) LAOAG CITY – Umabuten ti nasurok a sangaribo ti bilang dagiti nadadael a balay iti agtultuloy a panagpuswak ti lava ti Kilaue volcano idiay Big Island, Hawaii.
Daytoy ti inbatad ni Bombo Interantional Correspondent Manny Pascua.
Segun kenkuana, maibasar iti Hawaii Civil Defense, dagiti nasurok a sangaribo a nadadaelen a pagtaengan gapu iti pannakagabor da ket 657 dagiti adda papeles na idinto a 614 met ti kurang dagiti papeles idiay Lower Puna.
Gapu iti daytoy, umabot iti 372 a million a dolyar ti balor dagiti nadadael a pagtaengan ken posible a manayunan pay.
Kabayatan na, umabot metten ti nasurok nga innem a ribo nga acres weno nasurok a dua a ribo nga ektarya ti kabakiran ken kataltalunan ti nagaburan ti lava.
Nupay kasta, agtultuloy met latta ti pananggmonitor ti gobyerno ti Big Island iti aniaman a banagen na iti agtultuloy paya laeng a panagputok ti nasao a bulkano.
