LAOAG CITY – Kinumpirmaran ni Barangay Chairman Jondie Bayudan iti Barangay Sto. Niño iti ili ti Nueva Era nga adda ti grupo nga agrec-recruit kadagiti residente a makipagkameng kadakuada tapno makaala da ti bingay manipud iti kinabaknang ti pamilya Marcos.
Segun kenni Bayudan, ti nasao a grupo ket nagpabigbig a “Kapisanan ng mga Katutubong Mamamayang Maharlika”.
Inbatad na nga iti pannakisarsarita na kadagiti kabarangayan na ket inkari ti grupo nga adda ti maala da a kwarta manipud ti pamilya Marcos.
Kunana a karaman kadagiti biruken ti grupo ket ID, sangapulo a pisos ken mapan da iti Barangay Manalpac iti ili ti Solsona ken idiay Cabugao, Ilocos Sur tapno agmi-meeting mainaig iti daytoy.
Naamoan a ti naikari kadagiti residente ket makaala da ti maysa a milyon a pisos.
Inlawlawag na a dagiti maseknan a kabarangayan na a maal-allukoy kadagitoy a gundaway nga umabot ti 176 ket isuda met laeng ti naggapo idiay Metro Manila para met laeng iti nasao a banag.
Innayon na a gapo iti kinarigat ti biag ket mabalin nga isu ti mangidurduron kadagiti kalugaran na tapno makipagkameng iti nasao a grupo.
Kabayatanna, plano ni Bayudan nga ipakaammo daytoy kenni Gov. Matthew Marcos Manotoc ken dadduma pay a maseknan nga ahensya.
