LAOAG CITY – Inrakurak ti Department of Agriculture (DA) a dumanon iti nasurok 101,000 metric tons (MT) ti imported a bagas ti simmangpet ditoy Pilipinas idi Hulio kalpasan ti panangkissay iti taripa.
Basar iti Department of Agriculture, simmangpet iti nasao a volume kagiddan ti panangipatungpal ti Executive Order No. 62 wenno ti panagbaba ti taripa iti imported a bagas manipud 35 agingga 15 a porsiento idi Hulio 5 a mangitunda ti panagbaba ti presio ti retail ti bagas ti P6 agingga iti P7 iti kada kilo.
Segun ken ni Department of Agriculture Assistant Secretary Arnel de Mesa, basar iti Philippine Statistics Authority (PSA), nakairekord ti Pilipinas ti nasurok 8.53 milyon a metriko tonelada para iti umuna a semestre ti tawen.
Inbatadna a napigsa a panaggatang ti National Food Authority (NFA) para iti nailian a rice buffer stock ti pagilain a nakaala ti 3.5 a milyon a sako ti irik.
Iti agdama, ti sektor ti bagas ket nakagun-od ti sumurok-kumurang a 10,639 metric tons ti volume loss nga agbalor ti P635.17 a milyon, nga adda iti uneg ti 500,000 metric tons agingga iti 600,000 metric tons a tinawen a namnamaen a pannakalugi gapu iti natural a didigra.
