LAOAG CITY – Mapattapatta nga 11.6 million senior citizens ti manamnama nga agbutos iti Barangay ken Sangguniang Kabataan Elections ita nga aldaw, Lunes, Oktubre 30.
Segun ken ni Atty. Franklin Quijano, Chairman ti National Commission for Senior Citizens, mabalin a maibilang daytoy a dakkel a bilang manipud kadagiti senior.
Inbatadna a naragsakda gapu ta tinungpal ti Commission on Elections ti karina a mangilatang kadagiti special polling precincts para kadagiti senior citizens para iti nalaklaka wenno kombeniente a panagbutosda ken panangipalubosda iti nasapsapa nga oras ti panagbutosda.
Mangnamnama met ni Quijano nga agtultuloy a tungpalen ti Commission on Elections dagiti dadduma pay a kiddawda kas iti electronic voting tapno makabutos pay laeng dagiti lallakay ken babbaket a saanen a makapagna kadagiti presinto wenno adda kadagiti nasulinek a lugar.
