LAOAG CITY – Nasurok 130 nga indibidwal iti nagkiddaw ti mental health support manipod iti Speak Up, I’m Here (SUIM) Center and Hotline sipod naisayangkat daytoy a programa idi Oktubre itay napan a tawen.
Segun kenni Ms. Divine Sevilla, agarup 100 nga indibidwal ti naasistaran babaen ti phone calls ken text messages, 36 iti Facebook Messenger ken 14 iti nagpakonsular iti face-to-face.
Inbatadna a kalpasan ti panangpakonsultar dagitoy ket adda ti regular a follow-up kadakuada tapno masigurado iti salun-at dagitoy.
Naamoan a kangrunaan kadagiti nagpakonsultar a kliyente ket agtawen ti 14 agingga iti agtawen ti 78 no sadinno a ti kangrunaan a concern wenno problema dagitoy ket ti pinansyal, panagadjust da iti new normal education, isyu iti relasyon, anxiety ken depression.
Malaksid iti dayta, gutgutiguten pay ti Speak Up, I’m Here dagiti kailyan nga isurat dagiti storyada maipapan no kasanoda a nabaelan dagiti problemada.
Mangnamnama ti SUIM a babaen kadagiti maisaysayangkat nga aktibidad ket masursurwan dagiti kailian nga ipeksa dagiti kaririknada ken mapasayaat ti mental health dagitoy.
