LAOAG CITY – Inpakaamo ni Mr. Justin Paul Marbella, ti information officer iti DOLE-Region 1 a kageddan a maiyuswat ti Job Fair ditoy probinsya intuno Mayo 1.
Daytoy ket kageddan ti pannakaobserbar ti maika-120 a Labor Day.
Segun ken ni Marbella, adda ti 18,499 a job vacancies ti maidiaya iti intero a rehiyon uno.
Inbatad na a ditoy probinsya nu sadino a maisayangkat ti nasao nga aktibidad iti dakkel a mall iti ili ti San Nicolas ket 5,199 ti job vacancies a maidiaya.
Kabayatanna, kuna na nga iti Ilocos Sur ket 5,986 idinto nga idiay Pangasinan ket 7,314 ti malukatan nga spot para kadagiti agkasapulan ti trabaho.
Mainaig iti daytoy, inpakaammo ni Marbella a kaaduan kadagiti maidiaya a trabaho ket iti local jobs ken adda met ti para iti ballasiw taaw.
Inbatad na a kaaduan a maidiaya a local a trabaho ket iti industriya ti customer service wenno dagiti agpaay iti Business Process Outsourcing (BPO) companies.
Malaksid kadagiti maidiaya a trabaho, kuna ni Marbella a makipagpaset iti aktibidad para iti Labor Day dagiti dadduma pay nga ahensya ti gobierno kas iti DTI, BIR ken PSA tapno dagitoy ti mangasistir kadagiti employer wenno dagiti kalikagumna ti agiproseso ti negosyo.
Immunan nga inpakaammo ni Marbella nga iti panagaplikar ti trahabo intuno Mayo 1 ket masapol laeng a mangisagana ti ado a kopya ti resume a maipasa ken agarwat iti presentable.
