LAOAG CITY – Inlawlawag ni Barangay Kagawad John Glenn Duldulao iti Brgy. 19 iti ili ti Sarrat ti umabot iti 20,000 a pisos a bayadan iti kuryente ti masakopan na a sitio iti nasao a barangay.
Segun ken ni Duldulao, Agosto 19 ita a tawen idi adda ti kimat ket isu ti nakaapektar iti maysa a metro ken breaker dagiti street lights iti ungto ti sitio a masakupan na.
Gapu iti daytoy, inbatad na a dagus nga inpakaammo na iti Ilocos Norte Electric Cooperative (INEC) ngem saan a dagus a nasukatan.
Kuna na a gapu ta saan pay a dagus a maurnos ti naperdi a metro ket naibilin a ti pay laeng lineman ti barangay ti mangkita.
Inpakaammo na a naiyakar ti koneksyon ti naapektaran nga street lights iti maysa a metro a nabayagen a saan a nagoperar.
Mainaig iti daytoy, inbatad ni Duldulao a nagmakabulan ti koneksyon ti street lights iti nasao a metro ken idi adda ti panag-reading ket dita a naklaat gapu ta nasurok 20,400 a pisos ti rimuar a bill.
Kuna na a nagkamang iti maikadua a gundaway iti INEC tapno maipadanon ti pasamak.
Inbatad na nga immuna nga atapen ti INEC a posible a nabaybay-an dagiti street lights a nakasilaw iti agmalem ken agpatpatnag rason a nangato ti bill dagitoy.
Nu pay kasta, inpetteng ni Duldulao a saan a mapasamak daytoy rason nga inbalakad met iti biang ti kooperatiba ti nasken nga aramiden na tapno mapaneknekan a saan a pudno ti bayadan da.
Inpakaammo ti kagawad nga iti panangala na ti ladawan ti metro iti agsapa ti bigat agingga iti malem a nakaiddep dagiti street lights ket dita a napaneknekan nga agkonkonsumo latta ti kuntador.
Inbatad na a gapu iti daytoy ket nasolbar ti problema ken nasukatan ti metro iti masakupan na a sitio.
