LAOAG CITY – Naiget ti implementasyon dagiti pagalagadan kontra ti coronavirus disease idiay Singapore.
Daytoy ti inbatad ni Mrs. Lucila Pablo Suniga, OFW iti Singapore a maysa kadagiti Pilipino a naapektaran ti lockdown.
Kuna na nga agmulta ti 300 a dolyar wenno katukad ti nasurok 10 a ribo a pisos dagiti matiliw nga agsalungasing ti paglintegan.
Segun kenni Suniga, mamulta pay ti 600 a dolyar wenno katukad ti nasurok 21 a ribo a pisos dagiti matiliw a mangan kadagiti restaunrant.
Inlawlawag na a take out laeng ti mabalin kadagiti nagduduma a pasdek panganan gapu kadagiti naipatungpal nga alagaden tapno maliklikan ti panagwaras ti covid-19.
Mainaig iti daytoy, awan met dagiti naamuan ni Suniga a Pilipino a natiliw wenno nagsalungasing kadagiti guidelines ti Singapore.
Kabayatanna, sumabot ti nasurok lima a ribo a kaso ti naimaldit ti Singapore, ken dagiti kangrunaan a naapektaran ket dagit agtrabtrabaho iti ruwar ken dagiti agnanaed iti maysa a dormitoryo a posible nga aggiinnakar da.
Innayon ni Suniga nga awan met dagiti ammo na a Pilipino nga agserserbi kas katulong ti naapektaran ti coronavirus idinto a kaaduan kadagiti Singaporeans ket agtrabtrabahoiti uneg ti pagtaengan da.
