LAOAG CITY – Agdagup ti duapulo ket walo a milyon uppat a gasut siyam a pulo ket walo ribu tallo gasut a pisos dagiti ipaay ti gobierno probinsial a tulong kadagiti mannalon, mangngalap ken dagiti livestock raiser ditoy Ilocos Norte.
Inlawlawag ni Engr. Maria Teresa Bacnat, mangidadaulo ti Provincial Agriculture Office wenno PAO a daytoy ket babaen iti Agri Ka Dito ken dagiti dadduma pay a regular a programa ken proyekto ti PAO, Sustainable Development Center wenno SDC ken ti Provincial Veterinary Office wenno PVET kas paset ti napinget a kalikagum ni Gob. Matthew Marcos Manotoc nga alisto a pannakaipaay ti tulong kadagiti mannalon ditoy probinsia.
Imbatadna a dagiti nakiddaw iti babaen ti Agri Ka Dito ket agdagup ti maysa a milyon uppat a gasut duapulo ket uppat a ribu pito gasut limapulo a pisos.
Inbunannagna a sanga gasut limapulo ket siyam a mannalon manipud iti siudad ti Laoag ti benepisiario a maipaayan ti abono nga organic ken inorganic, foliar fertilizer, humus, jetmatic pump, knapsack sprayer, plastic drum, irrigation hose, pestisidio ken bin-i a nadumaduma a bukbukel ti natnateng.
Impalgakna a sabali pay dagiti duapulo ket tallo a livestock raiser a naapektaran dagiti tarakenda a baboy ti ASF ditoy siudad ti Laoag ti maipaayan ti saggaysa a kalding ken veterinary medicines kas iti bitamina ken pagpurga.
Kunana nga adda pay ti maipaay kadagitoy a “forage chopper”, plastic drum ken maysa nga “egg incubator”.
Segun ken ni Bacnat, tallopulo ket walo a gunglo dagiti mannalon kas kadagiti agmulmula ti natnateng, agmulmula ti tabako ken livestock raiser ti mabenipisiaran iti maibunong a lima a combine harvester, innem a 4-wheel tractor, lima a multi-cultivator ken sangapulo ket maysa a hand tractor nga agbalor iti duapulo ket innem a milyon siyam a pulo ket lima ribu a pisos.
Inbatadna nga agdagup iti tallo gasut pitopulo ket siyam a ribu ken limapulo a pisos ti maipaay a tilapia fingerlings ken fishnet wenno iket kadagiti walopulo a mangngalap ditoy siudad ti Laoag.
Malaksid iti daytoy, adda pay ti maibunong a rehab inputs para kadagiti agmulmula ti mangga ken High Value Crops wenno HVC anaapektaran ti bagyo Neneng iti nadumaduma nga ili ken siudad ditoy probinsia.
Inlawlawagna a maibilang ditoy ti nadumaduma a klase ti abono ken foliar fertilizer a pinundoan ti Departamento ti Agrikultura nga ibunong ti gobierno probinsial babaen iti PAO.
