LAOAG CITY – Immapela ti San Lazaro Hospital kadagiti Local Government Units a luktan dagiti animal bite centers-da tapno maipaay ti serbisio medikal kadagiti dadduma a lugar.
Daytoy ket iti baet ti panagadu dagiti pasiente iti nasao nga ospital a napan nagpatudok iti anti-rabies vaccines gapu iti kinaadu dagiti makagkagat wenno makarkaramutan kadagiti taraken nga ayup ita a panawen ti kalgaw.
Iti naglabas nga aldaw, dumanon iti nasurok tallo a ribu a pasiente iti kada aldaw ti agturturong iti nadakamat nga ospital tapno agpabakuna kontra iti rabies.
Kaadduan kadagiti mapmapan iti San Lazaro Hospital tapno agpabakuna ti anti-rabies ket aggapu pay kadagiti nagduduma a lugar wenno non-residents ti Manila.
Inbatad ni David Suplico, Officer-In-Charge of the San Lazaro Medical Services a ti bilang dagiti nagpabakuna ti libre nga anti-rabies ita ket sobra ken saan nga ordinario gapu ta mabalin laeng nga umawat ti 800 a pasiente iti kada aldaw ti pasilidad.
Maipalagip nga idi Abril ket napunno met ti San Lazaro Hospital a mangas-asikaso ti nasurok-kumurang a 1,800 agingga 2,000 a pasiente iti tunggal aldaw nga agbirbiruk ti panagbakuna kontra iti rabies.
