LAOAG CITY – Umaboten iti 35 a tattao ti natay ken 200 ti nasugatan kalpasan a narpuog ti maysa a simbaan idiay Ethiopia.
Napasamak ti insidente iti Menjar Shenkora Arerti Mariam Church idiay Amhara no sadinno rinibo a tattao ti nagtitipon kas paset iti tinawen nga Orthodox Christian celebration ti St. Mary.
Segun kenni local police inspector Ahmed Gebeyehu, dagiti kumpirmado a pimmusay ket agtawen ti 25 agingga iti 80 ken posible a ngumato pay ti bilang dagiti natay idinto a dagiti nasugatan ket naitaray met iti Addis Ababa para iti naan-anay a pannakataming da.
Inbatad pay dagiti otoridad nga adda pay dagiti napupok a tattao iti narpuog a simbaan ken manarimaan ti rescue operations.
Naamoan nga ado a worshiper ti immuli iti scaffolding tapno makita da ti mural a nangitunda ti pannakarpuog daytoy.
Kabayatanna, nakipagladingit met ti gobierno ti Ethiopia ken inbatad daytoy a masapol a maiparungna ti kinatalged dagiti tattao no adda ti maipatakder a proyekto.
