LAOAG CITY – Umabot iti nasurok 300 a ribo a pisos ti balor dagiti amin a nadadael iti pannakauram ti maysa a pagtaengan iti Barangay Nagtrigoan iti ili ti Pinili.
Segun kenni SFO3 Bernard Agcaoili, Municipal Fire Marshal, BFP-Pinili, ti akin-kukua iti pagtaengan ket ni Mrs. Victoriana Rivera, agtawen ti 92 ken kadua na nga agnanaed iti nauram a balay ket dagiti annak na ken ti bukod a pamilya dagitoy.
Inlawlawag na nga iti panagimbestigar da, ni Rivera ket awan iti pagtaengan da iti napasamak ti uram gapo ta napan na kinita ti taraken na a kalding.
Inbatad na a manarimaannga aglutluto ti maysa kadagiti annak ni Rivera ken inrapin na ti nagsagad iti ruwar ti pagtaengan da.
Kunana nga adda pay ti nakalap da nga impormasyon na adda ti naka-charge a cellphone iti kwarto ti pagtaengan.
Dinakamat na a basar kadagiti ummuna a nakakita ket dakkel ti apoy iti kwarto ngem saan da nga ilisi ti posibilidad iti nangrugyan ti uram iti manarimaan a panagluto.
Naamoan a ti pagtaengan ket dua a kadsaaran ken naaramid babaen iti light materials.
Agtultuloy met ti naun-uneg nga imbestigasyon tapno maamoan no anya ti nangrugian ti uram.
