LAOAG CITY – Agdagup ti 3,095,000 a pisos nga insentibo ti inpaay ti gobierno probinsial iti babaen ti barangay incentivization program.
Indauloan ni Gob. Matthew Marcos Manotoc ti pannakaipaay ti tseke kadagiti maseknan a barangay ken inimatangan da Bise Gobernador Cecilia Araneta Marcos pakairamanan dagiti sumagmamano a Sanggunian Bayan Members ken opisial iti ili ti Solsona ken Paoay.
Inlawlawag ti gobernador nga iti ili ti Solsona, innem dagiti nakaawat iti 120,00 a pisos, tallo a barangay ti naipaayan ti 65,000 a pisos, uppat iti 60,000 a pisos ken dua ti nakaawat ti 35,000 pisos.
Kabayatanna, iti ili ti Paoay ket 11 a barangay dagiti nakaipaayan ti 120,000 a pisos, dua a barangay ti 65,000, lima ti 60,000 a pisos, dua a 35,000 a pisos, maysa a 20,000 pisos ken dua a barangay ti nakaawat met iti 15,000 a pisos.
Mainaig iti daytoy, impeksa ni Gob. Manotoc ti napalaus a panagyamanna kadagiti barangay frontliners gapu iti dakkel nga akem dagitoy iti pannakasaluad ti salun-at dagiti umili.
Ginutigot na dagiti nadakamat a frontliners a mangitultuloy iti napintas a serbisyo nga ipapaay da iti barangay tapno mataginayon ti nataltalged a probinsya iti baet ti pandemiya.
