LAOAG CITY – Umaboten iti 422 a medical frontliners iti Mariano Marcos Memorial Hospital and Medical Center ti nabakunaanen ti maikadwa a dose ti covid-19 usar ti sinovac vaccine.
Daytoy ti inbatad ni Dr. Gretchen Bonita Velasco-Ranada, ti Chairman, Public Health Unit ken Head ti Mariano Marcos Memorial Hospital and Medical Center – COVID-19 Vaccination Team.
Segun kenni Ranada, daytoyen ti maikatlo nga aldaw iti vaccination rollout da para iti maikadwa a dose.
Kunana nga idi Lunes ket umabot iti 153 ti nakaawat ti maikadwa a dose, idi kalman ket 139 ken ita nga aldaw nagpatingga iti 12 ti tengnga ti aldaw ket addan ti 130 a medical frontliners ti nabakunaan.
Mainaig iti daytoy, kunana a dagiti nabakunaan met usar ti astrazeneca vaccine itay kallabes ket masapol a walo agingga iti 12 a lawas ti palabsen sakbay a maitudok ti maikadwa a dose.
Inbatad na a no masurot ti petsa ti isasangpet dagiti bakuna nga astrazeneca ket maawat met dagiti maseknan ti maikadwa a dose iti bakuna iti maikadwa a lawas ti bulan ti Mayo.
Kabayatanna, kunana nga iti panagbakuna daidi ummuna a dose a naitudok no sadinno ket tallo ti nakapasar ti mild rashes ngem iti maikadwa a dose ket awan met ti nakaro nga epekto na kadakuada.
