LAOAG CITY – Addan ti 11 nga ili ken dua a siudad ditoy probinsya ti naapekataran iti African Swine Fever (ASF) virus.
Basar iti gobierno probinsyal, daytoy ket nasurok 50% iti kabuklan a bilang ti lokal a gobierno ditoy probinsya.
Gapu iti daytoy, kuna ni Governor Matthew Marcos Manotoc nga ikarkarigatan ti gobierno probinsyal a maipaayan ti tulong dagiti naapektaran nga hog raisers.
Ipatalgedna nga ar-aramiden ti gobierno probinsial ti amin a kabaelanna tapno maalay-ayan ti rigat a mapaspasaran dagiti kakailian nangnangruna ket naigiddan ti problema iti ASF ken pandemia gubuay ti COVID-19.
Mainaig iti daytoy, inlawlawag ti gobernador nga uray dagiti saan a naka-insured ti taraken na ket nailatangan ti pondo nu sadino a manipod iti immunan a P5.3M a nailatang ket nanayunan ti walo a milyon a pisos.
Malaksid iti daytoy, inpanamnamana nga agtultuloy ti pannakakiddaw iti Department of Agriculture ti agtultuloy a tulong para kadagiti apektado iti ASF.
