LAOAG CITY – Nasurok 6,000 a tattao ti naimaldit ti na-stranded iti biyahe gapu iti Bagyo Aghon.
Basar iti Maritime Safety Advisory nga inruar ti Philippine Coast Guard (PCG) ket na-stranded ti 48 a barko, 30 a de motor a bangka, 1,492 rolling cargoes.
Dagiti rehion nga adda iti monitoring ket ti Northeastern Mindanao, Bicol, Eastern Visayas, Central Visayas ken Southern Tagalog a pagdaliasatan ita ti nasao a bagyo.
Kinuna ni Philippine Coast Guard Spokesman Commodore Armand Balilo a nakasaganan dagiti deployable response groups (DRG) ken rescue assets ti ahensya iti Visayas ken Mindanao no inkaso a kasapulan ti evacuation and rescue operations dagiti amin a local government units (LGUs) a madungpar ti bagyo.
Binilin pay ni Coast Guard Admiral Ronnie Gil Gavan dagiti amin a Philippine Coast Guard District Commanders a siguraduenda nga awan ti matay bayat ti kalamidad.
Kabyataanna, binalakadan met ti ahensya dagiti pasahero ken mangngalap a saanda nga aglayag iti dakes a paniempo.
