LAOAG CITY – Umabot iti nasurok a maysa a milyon nga ubbing ti saan a nakabakuna kontra iti polio idiay Pakistan iti napalabas a bolan, kagiddan ti panagwaras manen ti nasao a sakit iti nadakamat a pagilian.
Dakkel a karit iti Pakistan no kasanu a mapukaw ti maysa kadagiti maibilang kas “most intractable diseases” iti lubong.
Basar kadagiti opisyal iti Pakistan, ita laeng a bolan ket nakairekord da ti nasurok a maysa a dosena a baro a kaso ti polio iti pagilian rason nga addan ti 39 a kaso ita a tawen no ikompara iti innem laeng iti napalabas a tawen.
Ti polio ket makaakar a sakit kangrunaan na dagiti ubbing nga awan pay ti lima ti tawen na, no sadinno a puntiryaen na ti nervous system a mangitunda ti pannakaparalisa, marigatan nga umanges ken agresulta pay ti pannakatay.
