LAOAG CITY – Umabot iti nasurok a 10 ribo a police officers iti intero a pagilian ti nai-promote kabayatan ti panangiyuswat ti Philippine National Police ti simultaneous oath-taking, rank-donning, ken pinning ceremony.
Basar iti Philippine National Police, adda ti pakabuklan a 10,297 personnel, pakairamanan ti 474 a commissioned officers ken 1,823 a non-commissioned officers ti nai-promote iti sumaruno nga higher rank.
Iti PNP National Headquarters iti Camp Crame, agrop 700 nga opisyal ti nagsapata ken nangawat ti baro a ranggo da iti presensya dagiti pamilya, katrabaho ken commanding officers da.
Indaulwan ni Acting PNP chief Lt. Gen. Jose Melencio Nartatez Jr. ti seremonya, kagiddan ti panangipaganetget na ti dakdakkel a reponsibilidad da kalpasan ti promosyon da.
Iti panagbitla ni Nartatez, inpetteng na a saan a ti kabayag iti training ti kitkitaen ti publiko no di ket no kasanu ti panagtrabaho dagitoy.
Innayon ni Nartatez a ti promosyon ket saan laeng a personal achievements ngem commitment iti panangidaulo ken pagsungsungbatan.
Ginutigot na pay dagiti opisyal ti nailian a pulisya nga agserbi kas pagwadan, suruten dagiti pagannurutan ken liklikan ti shortcuts, aglalo kadagiti pagdalanan a pannubok.
