LAOAG CITY – Umabot iti nasurok a 100 a tattao ti mapukpukaw ken uppat dagiti kumpirmadon a natay kalpasan ti napasamak a flash floods iti Dharali area ti Uttarkashi district iti estado ti Uttarakhand idiay India.
Napasamak ti flash floods kalpasan ti sumagmamano a lawas a panagtudtudo na ti napigsa iti nadakamat a lugar.
Gapu iti napasamak ket naiyanod dagiti pagtaengan ken hotel iti Gangotri pilgrimage site.
Nai-deploy met a dagus ti emergency teams pakairamanan dagiti pulis, suldado ken disaster response forces tapno tumulong kadagiti biktima a naapektaran ti kalamidad.
Malaksid iti daytoy, nangipatulod pay ti Indo-Tibetan Border Police (ITBP) ti 16 a miembro ti grupoda ken naruay a personnel ti naka-standby.
Basar kadagiti local officials, adu a pasdek ti nadadael ken naminpinsan a naiyanod pakairaman ti agarup 20 agingga iti 25 nga hotels ken guesthouses gapu iti nakaro a layos.
Kabayatanna, inpakaammo ni Uttarakhand’s chief minister Pushkar Singh Dhami a manarimaan ti pannakikoordinarna kadagiti senior officials ken inpasiguradona ti naiget a relief and rescue operations.
