LAOAG CITY – Maysa a convoy ti nasurok a 100 a truck ti United Nations a naglaon kadagiti taraon ti nadamsak a natakawan idiay Gaza.
Inbatad ti United Nations agency for Palestinian refugees (Unrwa) a kabayatan a dumaldalyasat ti convoy iti Kerem Shalom a kontrolado ti Israel ket bigla lattan nga adda dagiti nakamaskara a lallaki nga immatake ken nagibakal ti granada.
Iti panagsardeng ti convoy ket tinutukan ti paltog dagiti suspek dagiti driver ti convoy ken pwinersa da nga innala dagiti tulong a maikabil koma idiay Southern Gaza.
Agamak ni United Nations agency for Palestinian refugees commissioner general Philippe Lazzarini a no awan ti dagus nga interbensyon ket kumaro ti panagkurkurang ti taraon iti Southern Gaza nga ad-adda pay a mangparigat kadagiti agarop 2 a milyon a tattao a nakadepende iti humanitarian aid tapno agbiagda.
