LAOAG CITY – Umaboten iti nasurok a 100 a ribo a pisos ti balor dagiti nadadael iti benneg ti agrikultura iti ili ti Nueva Era gapu iti iduduprak ti bagyo Carina ken epekto ti abagat.
Daytoy ti inbata ni Engr. Ruel Pendido, ti mangidadaulo iti Municipal Disaster Risk Reduction and Management Council iti ili ti Nueva Era.
Segun ken ni Pendido, karaman kadagiti naapektaran ket ti 6.75 nga ektarya a namulaan ti pagay, 1.25 nga ektarya a namulaan ti mais ken ti 53 a poon ti rambutan.
Innayon na nga iti biang ti fisheries ket adda ti nakurang a maysa nga ektarya a partially damaged gapu iti panagngato ti lebel ti danom a gubuay ti bagyo Carina ken abagat.
Mainaig iti daytoy, inpakaammo na nga awan met ti nagbalin a problema iti komunikasyon ken suplay a danom iti nadakamat nga ili.
Iti agdama, kuna ni Pendido a manarimaan ti panagmonitor da iti Cabittauran Bridge gapu ta ngimmato ti lebel ti danom na rason a saan a makapagna dagiti residente ken nagaramid da ti alternatibo a rota da iti paset ti sitio Kaduyungan iti Barangay Cabittauran iti ili ti Nueva Era.
