LAOAG CITY – Adda ti pakabuklan a 1,370 a classrooms ti naireport a nadadael gapu iti iduduprak ti bagyo Opong ken ti epekto ti angin abagat.
Basar iti Department of Education, manipod iti nasao a bilang ket 891 a classrooms dagiti naireport a minor damage, 225 ti major damage, ken 254 ti totally damaged.
Inrakurak pay ti Department of Education nga adda ti 13.3 milyon nga agad-adal ken 569,000 personnel manipod iti 23,796 a pampubliko a pagadalan iti 13 a rehiyon ti apektado.
Kaadoan kadagiti naapektaran nga estudyante ket manipod iti Bicol Region, Eastern Visayas, CALABARZON, Central Luzon, ken MIMAROPA.
Inpakaammo ti Department of Education a naiget ti koordinasyon da kadagiti maseknan a Local Government Units iti pannakaisagana dagiti pagadalan a nagpasar ti perdisyon para iti panagsubli ti klase.
Immunan nga inreport ti National Disaster Risk Reduction and Management Council nga adda ti pakabuklan a 738,714 a pamilya wenno 2,797,706 nga indibidual ti naapektaran kadagiti nagsasaruno a bagyo Mirasol, Nando, Opong, ken ti epekto ti abagat.
Umabot met iti 26 nga indibidual ti natay, 33 a sabsabali dagiti nasugatan ken 14 dagiti mapukpuka.
