LAOAG CITY – Umabot iti 14,158 a Filipino nursing graduates ti dimmalan iti U.S. licensure examination manipod iti Enero agingga iti Hunyo 2024.
Inbatad ni Quezon City Rep. Marvin Rillo, Vice Chair ti House committee on higher and technical education nga adda ti pakabuklan a 14,158 a Bachelor of Science in Nursing (BSN) graduates manipod iti Pilipinas ti nangala ti U.S. licensure examination tapno makapagtrabaho da idiay Amerika.
Kunana a mapatta-patta a 57 a porsiento dagiti nursing graduates manipod iti Pilipinas ti nakapasa iti U.S. licensure test iti umuna a gundaway a panageksamen dagiti maseknan.
Dinakamat pay ni Rillo nga iti datos ket naireport nga iti uneg laeng ti 12 a bolan idi 2023 ket adda ti 36,410 nursing graduates manipod iti Pilipinas ti dimmalan ken nakapasa iti U.S. licensure test.
Innayon ti agpanpanday linteg nga iti nakalap na nga impormasyon manipod iti U.S. Bureau of Labor Statistics, mapatta-patta nga $86,070 wenno katukad ti nasurok a P5 milyon ti sweldo dagiti registered nurses iti Amerika.
Gapu iti daytoy, inlungalong ni Rillo ti HOuse Bill 5276 para iti pannakapagbalin a P63,997 iti kada bolan ti entry-level pay ti public nurses manipod iti agdama a P36,619 ti kada bolan.
