LAOAG CITY – Umabot iti nasurok a 18 a milyon pisos iti balor ti nadadael iti benneg ti agrikultura ditoy Ilocos Norte gapu iti epekto ti El Niño phenomenon.
Daytoy ti inpakaammo ni Mr. Danilo Arade, ti Senior Agriculturist ken Provincial Rice Coordinator iti Provincial Agriculture Office.
Segun kenkuana, dagiti kangrunaan a naapekataran nga ili ditoy probinsia ket iti ili ti Bacarra, Bangui, Banna, Burgos, Dingras, Nueva Era, Pasuquin, Piddig, iti siudad ti Batac ken ditoy siudad ti Laoag.
Inbatadna nga adda ti pakabuklan a 592 nga ektarya iti naapektaran no sadino 14.9 nga ektarya ti maibilang a totally damage ken 551.86 nga ektarya iti partially damage.
Inlawlawagna a daytoy a kalawa nga ektarya ket manamnama a manayonan pay no bilang agtultuloy ti pangta ti El Niño phenomenon ditoy probinsia.
Kunana a gapu iti daytoy agdama a mapaspasaran a situasion ket adda iti posibilidad a ngumato ti presio ti irik pakairamanan iti bagas.
Mainaig iti daytoy, kuna ni Mr. Arade nga adda ti inpaay ti gobierno probinsial a fuel subsidy nga agbalor ti tallo ribu a pisos kadagiti 100 a mannalon tapno maalay-ayan ti kinarigat a mapaspasaranda.
Malaksid iti daytoy, kunana nga adda pay ti 40 nga units ti water pump ti naibunong kadakuada no sadino tunggal maysa nga unit ket lima a mannalon ti mabenepisiaran.
