LAOAG CITY – Adda ti nasurok a 2.8 a milyon a pisos ti naiyalokar a pondo iti pannakaiwayat ti Region 1 Athletic Association Meet.
Daytoy ti inpakaammo ni Regional Director Tolentino G. Aquino iti Department of Education Region 1.
Inlawlawag a ti nasao a pondo ket manipod iti Department of Education – Central Office ngem daytoy ket saan a makaanay para iti amin a kasapulan bayat ti pannakaiwayat ti nasao nga aktibidad.
Gapu iti daytoy, inbatad na nagkiddaw da ti nayun ti pondo iti gobierno probinsyal iti Ilocos Norte no sadinno a dagus a pinatgan daytoy ni Governor Matthew Marcos-Manotoc.
Maragsakan ni Aquino gapu ta babaen iti nainayun a pondo manipod iti gobierno probinsyal ket umanayen daytoy tapno masigurado nga agballaigi ti Region 1 Athletic Association Meet.
Immuna iti daytoy, inpakaammo ti organizing committee ti Region 1 Athletic Assiociation nga adda ti nasurok a 10,000 nga atleta ti nakipartisipar iti nasao nga aktibidad nga addaan ti tema nga INvironment a maiyannatop iti pannakaselebrar iti earth day a naiggidan kti pormal a panaglukat ti Region 1 Athletic Assiociation.
