LAOAG CITY – Nasakit ti nakem ni Mr. Theodoro Emmerso Salbatiera a taga San Nicolas, Ilocos Norte kalpasan a nairuwar ti savings na nga umabot ti nasurok a 250 ribo a pisos iti East West Bank iti nasao nga ili.
Inlawlawag na iti Bombo Radyo Laoag nga idi Hulyo 22 ita a tawen ket napan nagdeposit ti 20 ribo a pisos ken idi nagbalance ket 246, 462.16 ti karga ti ATM na.
Nupay kasta, kuna na nga idi Agosto 3 ket nagtext ti bangko kenkuana nga adda ti agiwith-wihtdraw iti savings na isut gapuna a napan a dagus iti bangko, ngem idi nagbalance ket temporary block ti account na.
Nadismaya ni Salbatiera gapu ta inbaga kenkuana ti bangko a saan dan a maisubli ti kwarta na gapu ta authorized withdrawal ti napasamak.
Inpakaammo na nga iti panangrebisar da ti CCTV ket nakita da ti maysa a naka-maskara ken naka-helmet a napan nagwithdraw iti oras ti alas-otso ti rabii idi Hulyo 30 ken Hulyo 31 ita a tawen.
Innayon na a nagkari ti bangko ngem imbestigaren da daytoy iti uneg ti 30 agingga ti 60 nga aldaw.
Inkari ni Salbatiera a saan nga agsardeng agingga a saan a malawlawagan ti napasamak gapu ta nagbannogan na ti kwarta na.
Segun pay ken ni Salbatiera, ti naudi a panangiruwar na ti kwarta ket idi Hunyo ken manmano laeng a mapan agwithdraw.
Iti palawag met ti nasao a bangko iti Bombo Radyo, mabalin a nagpasukat ti ATM ni Salbatiera ken ti dati nga ATM na ket inbelleng na ken adda ti nakapidot.
Inpetteng met ni Salbatiera a saan pay a pulos a nagpaspasukat ti ATM ken no bilang agpasukat ket responsibilidad ti bangko nga iblock ti dati nga account na.
