LAOAG CITY – Inbatad ti Department of Social Welfare and Development (DSWD) nga umaboten iti 25,904 household-beneficiaries ti Pantawid Pamilyang Pilipino Program (4Ps) nationwide ti nagturpos iti programa kalpasan a naibilang dagitoyen iti self-sufficiency status.
Inrakurak daytoy ti Department of Social Welfare and Development no sadinno a ti nasao a bilang ket basar iti datos iti umuna a kwarter ti agdama a tawen.
Segun ken ni Asst. Secretary for Disaster Response Management Group Irene Dumlao, dagiti nagturpos a benepisyaryo ti programa ket nabigbig iti naiyuswat a ‘Pugay Tagumpay’ graduation and exit ceremonies iti nagduduma a Department of Social Welfare and Development Field Office, katulungan da ti local government units (LGUs).
Inbatad ni Asst. Secretary Dumlao, co-spokesperson ti Department of Social Welfare and Development, ti ‘Pugay Tagumpay’ ket maibilang a komendasyon kadagiti benepisyaryo a mapasayaat ti biag gapu metlaeng iti programa ti ahensya iti tulong ti sumagmamano a partner stakeholders.
Mainaig iti daytoy, inbatad ni Dumlao a ti household beneficiaries a nakagun-oden ti self-sufficiency status, karaman dagiti nagboluntaryo a pumanaw manipod iti programa ket naiyendorsar iti local government units (LGUs) a pakaibilangan da tapno mapagtalinaed a mapasayaat ti sitwasyon da.
Ti Pantawid Pamilyang Pilipino Program ket maysa a flagship program ti gobyerno a gagem na a mapalung-aw ti biag dagiti marigrigat a Pilipino iti babaen ti panangipaay ti tulong iti panagpaadal kadagiti agtutubo, nutrisyon ken salun-at.
