LAOAG CITY – Possible a magun-od ti Commission on Elections (Comelec) ti target na a 3 a milyon a baro a rehistrado a botante para iti 2025 midterm polls iti sumaruno a bolan.
Daytoy ti inbatad ni Elections chairman George Garcia bayat ti pannakisango na kadagiti kameng ti media.
Iti interview ken ni Garcia, nasaludsud kenkuana no magun-od da ti tallo a milyon a target ti ahensya.
Insungbat ni Garcia a mabalin a magun-od da ti target da iti bolan ti Hunyo ti agdama a tawen ken itultuloy da latta ti
voter’s registration para kadagiti baro a botante.
Kuna ni Garcia a namnamaen ti Commission on Elections ti 3.3 agingga iti 3.4 milyon nga aplikante agingga intono Setyembre 30, a maudi nga aldaw ti registration period.
Basar iti kaudian a datos ti Commission on Elections, addan ti 2,725,089 nga aplikante tapno agbalin a rehistrado a botante a nagpila iti nagbaetan ti Pebrero 12 agingga iti Mayo 7.
Ti Calabarzon paylaeng ti kaadoan ti bilang dagiti aplikante nga addaan ti 493,392; sumaruno ti National Capital Region nga addaan ti 420,212; ken Central Luzon nga addaan ti 314,324.
