LAOAG CITY – Umabot iti 365 a tattao ti naitaray iti ospital kalpasan a maipagarop a nasabidungan da iti kinnanda a libre a pangaldaw iti pagadalan iti ili ti Sragen iti Central Java idiay Indonesia.
Daytoyen ti maibilang a kadakkelan a bilang dagiti nasabidungan manipod iti naipaay kadakuada a libre a taraon babaen iti programa ti gobierno ni President Prabowo Subianto.
Gapu iti napasamak ket temporaryo a nasuspenso ti pannakaiserbi ti libre a taraon iti Sragen kabayatan a maiyur-uray ti resulta ti pannakaeksamen dagiti makan a maipagarop a nakasabidong kadagiti ginasut nga indibidual a kaadoan ket estudyante.
Ti nasao a programa ket napondoan ti 28-bilyon a dolyar ken daytoy ti maysa kadagiti inkari ni Presidente Subianto idi panawen ti kampanya tapno masolbar ti kaado dagiti malnourish iti nadakamat a pagilian.
