LAOAG CITY – Umabot iti 31,298 a kameng ti Philippine National Police (PNP) ti maiwaras para iti pannakaobserbar ti All Saints’ Day ken All Souls’ Day intono Nobyembre 1 ken 2.
Daytoy ti inpakaammo ni Philippine National Police spokesperson Police Brigadier General Randulf Tuaño.
Kuna ni Tuaño a no panawen ti Undas ket naka-full alert status ti nailian a pulisya no sadinno a saan a mapalubusan dagiti personnel nga agbakasyon wenno agabsent.
Innayon na nga adda ti pakabuklan a 5,169 a police assistance desks iti intero a pagilian intono Undas.
Malaksid kadagiti kameng ti pulisya ket adda pay ti pakabuklan a 11,707 a personnel manipod iti Armed Forces of the Philippines, Bureau of Fire Protection, ken ti Philippine Coast Guard a tumulong a mangipasigurado ti seguridad para iti pannakaobserbar ti All Saints’ Day ken All Souls’ Day.
Iti biang met dagiti force multipliers, adda ti 29,899 a personnel manipod iti barangay governments ken non-government organizations ti manamnama a tumulong.
