LAOAG CITY – Inrakurak ti World Health Organization a nasurok a 3,500 a tattao ti matmatay iti intero a lubong iti kada aldaw gapu iti hepatitis virus.
Segun iti World Health Organization, agtultuloy a ngumatngato ti kaso ti hepatitis iti intero a lubong.
Kas pammaneknek ket daytoyen ti maikadwa nga impeksyon a mangitunda ti pannakatay, sarunwen na ti tuberculosis.
Maipalagip nga idi 2022 ket adda dagiti report a 1.3 million ti pimmusay gapu iti nasao a sakit, nangatngato ngem ti 1.1 million na nairekord idi 2019.
Gapu iti daytoy, nagpanawagan ti World Health Organization a paigetan pay dagiti addang tapno malabanan ti Hepatitis kangrunaan na ket adda dagiti nalaka ken epektibo nga agas para iti daytoy.
Inkalintegan ti organisasyon nga ado dagiti matmatay iti nasao a sakit gapu ta bassit laeng dagiti madidiagnose ken maag-agasan.
Naamoan a two thirds ti hepatitis cases ket manipod iti Bangladesh, China, Ethiopa, India, Indonesia, Nigeria, Russia, Vietnam, ken uray iti Pilipinas.
Sumagmamano kadagiti sintomas ti hepatitis ket loss of appetite, abdominal pain, dark-colored urine, joint pain, ken jaundice wenno panagyelow ti mata.
